domingo, 22 de abril de 2018

ONDE VAI QUE TEMOS 5!
No segundo trimestre tivemos varios aniversarios, así que nesta entrada vai moita información, imaxes e vídeos das visitas que tivemos para celebrar os aniversarios de Ian, Xoel, Olalla e Saúl, que...onde vai que teñen cinco!

En xaneiro celebramos o aniversario de Ian. Visitounos Yesenia, a súa tía e profe do noso cole! Como a Ian lle encantan os contos, elixiron xuntos un dos seus preferidos e, xuntos, contárono xenial. Aquí vos deixo un pequeño vídeo coas imaxes daquel día e outro no que poderedes ver o ben que o fixeron. Mil grazas pola visita, Yesenia!


Aniversario IAN


VÍDEO IAN




No mes de febreiro celebramos o aniversario de Xoel, no que tamén tivemos moita sorte porque nos visitou Judit, a súa irmá, que nos leu un conto e acompañounos na celebración! Moitísimas grazas por vir, Judit. Podes volver cando queiras!



ANIVERSARIO XOEL 5

E no mes de marzo, Olalla e Saúl cumpriron cinco anos!
Primeiro celebramos o aniversario de Olalla, ao que viu Avelina, a súa avoa, coa que aprendimos a facer filloas e nos fixo un montón enoooorme delas. Mmmmm....que ricas estaban con nata ou chocolate!! Moitas grazas, Avelina!

Uns días máis tarde celebramos o aniversario de Saúl con mooooita música! A súa familia ao completo visitou a aula e puidemos ver as partes do clarinete, o ben que canta e conta María e o ritmo que ten Saúl, unha pasada!! Despois, ensináronnos a facer xabóns de diferentes olores e cores e merendamos uns saborosísimos amorodos con nata :)
Moitísimas grazas a María, Marcos e Rodrigo! Pasámolo xenial!

ANIV. SAÚL 5

VÍDEO SAÚL

luns, 22 de xaneiro de 2018

DE CANDO FOI NADAL
Hoxe ímosvos contar brevemente cómo foi o noso último día do ano, porque o pasamos tan ben e estabamos tan guapos e guapas e bailamos tan marabillosamente, que non volo podedes perder!
O primeiro que fixemos foi levarlles aos nosos padriños e madriñas a postal de Nadal que lles fixeramos uns días antes, mirade que bonitas quedaron:


Logo, fixemos algunha foto de grupo:

E, con moitísimas ganas, fomos bailar e gozar do festival de Panxoliñas! Aquí está o vídeo da canción que eliximos:


 
 
Pero isto non acabou aquí, porque ao subir á nosa aula, logo de merendar....tivemos visita!!

 

E cando pensabamos que xa non había nada máis...mirade a sorpresa que levamos cando chegamos ao cole das vacacións :) Agardamos que vos guste tanto como a nós!
 


Viñeron os Reis!
 

luns, 15 de xaneiro de 2018

XA TEMOS CATRO ANOS!

Uns días antes de ir de vacacións tamén celebramos o aniversario de Isaac, e...xa temos todxs catro anos!
Para festexar este día tan especial contamos coa visita de Alicia, a nai de Isaac, coa que fixemos unhas galletas riquísimas. Con moldes de estrela fixemos moitas galletas que fomos metendo no formo mentres nós dabamos conta dun biscoito moi saboroso!
Moitas grazas, Alicia, por visitarnos e ofrecernos esa actividade! Encántanos recibir visitas, e son días e celebracións que sempre lembramos :)
Aquí vai un vídeo coas fotos dese día. Agardamos que vos gusten!
 
 


Aniversario Isaac

venres, 1 de decembro de 2017

E VÓS...CONTADES?

Na aula xurden momentos máxicos que temos a sorte de vivir xuntos, e hoxe queremos compartir un deles con vós.
 
Cada día, ao longo da mañá, hai un momento para o conto. É algo imprescindible na nosa aula. Pode ser a primeira hora, despois do patio e de relaxarnos, para despedirnos antes de rematar a xornada…. Pero sempre hai un conto, cada día. Ás veces é un conto novo que non coñecen, outras veces algún neno ou nena elixe un conto da biblioteca da aula, outras piden un conto que lles gusta especialmente a todos (increíble, verdade?), outras contamos un conto sen libro, e outras traen eles contos da biblioteca particular da súa casa e incluso nolo contan! Como ledes, hai moita variedade.
 
Cando lles contamos un conto aos nosos fillos e fillas estamos contribuíndo enormemente ao seu desenvolvemento. Escoitan sons, palabras e expresións que pouco a pouco incorporan ao seu vocabulario, aprenden a modular a voz, a expresarse, a falar para os demáis. Tamén contribúe enormemento á súa imaxinación e ao seu repertorio visual, xa que os contos teñen unhas ilustracións que os pequenos analizan moi ben para seguir a historia e nas que hai moitas mensaxes que complementan o texto que nós lles lemos. Ademáis, as ilustracións son pequenas obras de arte que non podemos desaproveitar e debemos deternos nelas para aprender a observar e analizar.
 
Convivir cos libros é a base da educación. Neles hai diversión, aprendizaxe, valores, emocións, viaxes, amizade... E vós, ledes moitos contos? Animádevos a compartir con eles ese momento emocionante de descubrir xuntos unha historia, ide con eles a contacontos sempre poidades, e visitade as bibliotecas en busca de novas historias!
No cole hai moitos e podedes vir polas tardes a ler e/ou levar libros para casa, non deixedes pasar a oportunidade!
No vídeo podemos ver a Noa contándonos o conto do León Tolón que trouxo hoxe ao cole. Propuxémoslle que o contase despois do recreo, e xa vedes o ben que o fixo e o atentos que están todos os seus compañeiros e compañeiras. Gozamos moito do momento e eu, persoalmente, espero que todos, pouco a pouco e ao seu xeito, me conten moitos contos J


NOA CONTO

E para rematar, podedes comentar nesta entrada e contarnos cales son os vosos momentos preferidos para ler xuntos e o conto (ou contos) que máis vos gustan.
Moitas grazas, familias!

mércores, 29 de novembro de 2017

CELEBRAMOS OS 4 ANOS DE LEYRE!

A semana pasada Leyre estivo de aniversario e celebrámolo na aula coa compañía de Noelia, a súa nai. Noelia presentounos a Grisela, unha ratiña á que non lle convencía a cor gris da súa pel e cambiaba de cores continuamente, pero nunca estaba contenta. Afortunadamente, coa axuda dun amigo, decatouse do fermosa que era a súa cor e a tristeza desapareceu do seu rostro.
Logo fixemos ratos coma Grisela e vestímolos como mellor nos pareceu. Quedaron estupendxs!!
Para rematar, Leyre soprou as catro velas e merendamos biscoito, zume, e algunha lambonada máis.
Moitas grazas, Noelia, por animarte a vir e contarnos un conto.
Pasámolo moi ben!
 
 



Aniversario Leyre 4 anos

domingo, 29 de outubro de 2017

COCIÑAMOS?

O pasado xoves decidimos ir á cociña. Como este curso é a nosa primeira vez na cociña fixemos unha receita sinxela na que incorporamos un alimento propio do outono: a cabaza.
Aquí vos deixo a receita, por se queredes probar na casa:
- 300gr. de cabaza (sen pel nin pebidas), raiada.
- 4 ovos
- 250 gr. de azucre (nós fixémolo con menos e sae igual de ben)
- 75 gr. de aceite de oliva
- 300 gr. de fariña
- 16 gr. de levadura
- 1 cullerada de canela en pó
- Azucre glas para espolvorear por riba do biscoito, unha vez feito.
Cómo facelo:
Batir moito os ovos e o azucre. Incorporar aceite, fariña, levadura, canela, e finalmente a cabaza raiada. Mesturámolo todo moi ben metémolo nun molde. Logo, metémolo no forno durante 35 min. a 180ºC. Cando o saquemos do forno e enfríe, botámoslle azucre glas.
Xa vedes que é moi sinxelo, se probades na casa xa nos contaredes que tal!
Agora deixámosvos as fotos da nosa xornada na cociña.
Agardamos que vos gusten!
 

venres, 27 de outubro de 2017

LENDO AO SOL

Esta semana celebramos o Día Internacional das Bibliotecas escolares lendo cos nosos padriños e madriñas.
Primeiro buscamos un sitio agradábel no patio e comezamos as lecturas: Cocorico, Os Bolechas, Xirafa e crocodilo... as nenas e nenos de 4º elixiron moi ben os contos e nós gozamos moito escoitándoos.
Sen dúbida, foi un momento fermoso que repetiremos pronto!
 

Lendo cos padriños/madriñas